click

PLAY 

Fundashon Mariadal ta tuma medida di prekoushon sumamente severo

Entrante djarason 23 di sèptèmber Fundashon Mariadal ta tuma medida severo pa mas tantu posibel limitá plamamentu mas aleu di e vírùs di COVID-19. Ta pèrmití bishita na hòspital solamente si esaki ta realmente nesesario. Mas tantu posibel ta kontinuá ku kuido di pashènt.


E medidanan mas importante tras di otro:

    •    Temporalmente pashèntnan den hòspital no por haña bishita. Esaki no ta konta pa kambernan di parto, muchanan ku ta hòspitalisá i den algun kaso eksepshonal, despues di konsulta ku e dòkter ku ta duna e tratamentu.

    •    Habitantenan di Kas di Kuido por risibí maksimalmente 1 bishitante durante 1 ora, esaki solamente riba djamars i djaweps entre 18:00 i 20:00 or i riba djasabra di 12:00 – 14:00 or.

    •    Konsulta serka spesialista di e poliklínikanan, serka spesialista for di Kòrsou i Aruba tambe, ta sosodé mas tantu posibel via telefon òf pa medio di ‘videocall’. Pashèntnan ku realmente mester bishitá poliklínika ta haña mensahe telefóniko tokante esei i no ta pèrmití pa bini ku un akompañante, a ménos ku ta trata di mucha òf si tin kestion di un situashon eksepshonal i despues di hasi palabrashon ku dòkter.

    •    E kantidat di bishitante ku na mes momentu por bishitá laboratorio i botika ta keda limitá.

    •    Den kaso di bishita na Ayudo di Emergensia no ta pèrmití pa bini ku akompañante, a ménos ku esaki ta estriktamente nesesario.

    •    ‘Thuiszorg’ (Kuido na Kas) ta limitá su kantidat di bishita na kas den palabrashon ku e kuidadónan.

    •    Den palabrashon tambe ku e kuidadónan ménos kliente di aktividat durante dia lo haña tratamentu na Fundashon Mariadal i Ka’i Mimina.

    •    Ta posponé kuido ku no ta kuido di emergensia, si esaki ta nesesario pa motibu di COVID-19.


Hòspital a tuma medida ámplio pa por sigui duna bon kuido na tur pashènt i pa garantisá siguridat di su personal. Pa esaki tin personal di kuido, ekipo i remedi èkstra disponibel. Respetando privasidat di pashènt, nunka Fundashon Mariadal lo duna deklarashon tokante situashon òf tratamentu di su pashèntnan. E fundashon su empleadonan ta tene nan mes na nan sekreto profeshonal.


Solamente trahando huntu i pa medio di tene nos mes na e reglanan stipulá, mas tantu posibel nos por limitá daño di e vírùs di COVID-19.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com