click

PLAY 

Awe gabinete a disidí pa prolongá e pakete di sosten i rekuperashon pa habitante i kompanianan na Boneiru, Sint Eustatius i Saba ku nuebe luna mas te ku 12 di yüli 2021, en konekshon ku e vírùs di corona. Habitante i kompanianan na Boneiru, Sint Eustatius i Saba ta forma parti di Hulanda i p’esei por hasi uzo di medidanan paresido manera esunnan di Hulanda.


E krísis di corona tin un impakto enorme riba e komunidat di Hulanda Karibense. Tambe den e parti ekonómiko a haña sla duru. E sektor turístiko, riba kua un gran parti  di e ekonomia ta drei, a bin na un paro. En realidat Saba i Sint Eustatius tin seis luna será kaba pa e mundu di pafó.


P’esei gabinete a prolongá e areglo di supsidio di gastunan di salario i pèrdida di entrada pa nuebe luna. Ademas ta kompensá e entidatnan públiko finansieramente, pa pèrdida di entrada di impuesto i gastunan èkstra ku a hasi en konekshon ku e vírus di corona. Tambe tin un prolongashon i ekspanshon di e areglo di kompensashon di gastunan fiho.


E Sekretario di Estado di Asuntunan Interno i Relashonnan den Reino, e mandatarionan di Asuntunan Ekonómiko i Klima, e mandatarionan di Finansa i e Sekretario di Estado di Asuntunan Sosial i di Labor a manda e prolongashon di e pakete di sosten i rekuperashon aki Tweede Kamer.


Sekretario di Estado Raymond Knops na nòmber di gabinete ta bisa ku e situashon médiko i ekonómiko na Boneiru,Sint Eustatius i Saba ta keda preokupante. Na e momentu aki no tin bista ainda riba mehorashon pa e tres islanan. Ku e prolongashon aki di diferente medida ta protehá e entrada di habitante i kompanianan pa un periodo largu. Ku esaki e mandatarionan ta spera di mantené mayoria kupo di trabou. Ta keda tempunan difísil, kaminda lo pidi hopi di e komunidat. Na mes momentu gabinete ta konvensí ku den e krísis aki tambe e elastisidat di e islanan lo sòru pa huntu, gobièrnunan i komunidat na ámbos banda di oséano, lo sali afó.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com