click

PLAY 

Karentena pa esnan ku tabatin kontakto di aserka ku persona ku Covid-19

A bolbe konstatá un kaso positivo di Covid-19 manera a anunsiá. E persona ta na altura. Huntu kuné ta investigando unda e por a keda infektá. Ta nota tur hende ku e persona tabatin kontakto kuné durante e periodo ku e tin síntoma i tambe nèt promé ku e a bira malu. Ta determiná asin’ei si e kontaktonan ta kore riesgo. Na e grupo di riesgo aki ta pertenesé esnan ku ta biba den kas kuné i tambe esnan ku durante último dianan tabatin kontakto di aserka kuné. Ta pidi pa nan bai den karentena komo medida di prevenshon. Karentena ta nifiká ku un persona ta apartá su mes durante e periodo di inkubashon. Esaki ta pa sigurá ku e persona no ta desaroyá síntoma. Si e persona tin síntoma ta tèst’e pa determiná si e tin Covid-19.   

Den e investigashon pa haña e fuente i sa ku ken e tabatin kontakto, a bin deskubrí diferente persona ku ta keda konsiderá grupo di riesgo. Ta trata famia, kolega i trahadónan di instansia ku e persona ku Covid-19 tabatin kontakto di aserka kuné. A pidi tur e personanan aki pa bai den karentena. E kompania kaminda e persona ku Covid-19 ta traha tambe a tuma medida. E persona ta traha na WEB den un funshon na unda e no tin kontakto ku kliente.  

Un di e instansianan ku e persona ku Covid-19 a bishitá, ta hospital Fundashon Mariadal. Einan e tabatin kontakto ku algun trahadó. Fundashon Mariadal mes a pone e trahadónan aki den  karentena. E trahadónan no tin síntoma. Konforme e instrukshonnan tokante vírùs di corona ta prohibí nan pa tin kontakto ku otro persona. 

E chèns ku e pashènt nobo a infektá otronan ta chikitu. E persona aki a mantené su mes na e reglanan di higiena durante su bishita na hospital Fundashon Mariadal. E persona tabata na hospital pa un asuntu ku no tin nada di aber ku vírùs di corona. Ta respetá privasidat di e persona, su koleganan i e trahadónan di e hospital. Pa esei no ta bai duna mas informashon tokante nan.  

Un bes mas a mustra kon importante ta pa sigui e reglanan di higiena. E petishon pa mantené 1.5 meter di distansia, manera ta pinta aworakí, a prevení mas kontaminashon ku vírùs di corona. Ta importante pa keda mantené e instrukshonnan di higiena. Si bo tin síntoma relatá na Covid-19 keda kas i yama 0800-0800. Si no haña kontesta mesora yama despues un biaha mas òf purba yama ku un otro telefòn. Kome salú, move sufisiente i traha riba un bon resistensia. Kuida bo mes i esnan rondó di bo.   

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com