click

PLAY 

Kasonan kontra di moral dilanti hues

Riba djarason 30 di sèptèmber tabatin un kantidat di kaso kontra di moral den Korte di Promé Instansia na Boneiru. 

Un dòkter di kas di 61 aña a presentá dilanti hues pa motibu di akto kontra di moral ku un pashènt di 18 aña. E dòkter en kuestion mester a mishi i sunchi su pashènt kontra di su boluntad. E dòkter a keda kondená na un kastigu di prisòn kondishonal di 4 luna ku un periodo di prueba di 3 aña i 240 ora di trabou di tarea. Na promé instante e dòkter tabata di opinión ku pafó di konsulta si lo tabata posibel pa sunchi su pashènt, pero después e la bin realisá ku e la violá normanan étiko i sosial. Hues a enfatisá ku aktonan manera esaki ora ta trata di un relashon di dòkter ku pashènt semper ta kastigabel, fuera di oficina tambe. Fiskal a demandá alabes pa e dòkter no praktiká su trabou pa 2 aña pero mirando e echonan, hues a konsiderá esaki fuera di proporshon. E víktima tabata presente via konferensia di video. Su demanda pa daño perhuisio pa gran parti a keda otorgá. 

Dos bewaker riba e tereno di FKPD a keda kondená pa motibu ku nan a tene relashon seksual ku un habitante na aña 2016. Anteriormente un otro bewaker tambe a keda kondená pa esaki. E bewakernan a haña un kastigu di respektivamente 10 luna di kua 5 kondishonal i 8 luna di kua 4 kondishonal mas un periodo di prueba pa tur dos di 3 aña. Tantu fiskal komo hues a haña e komportashon aki repudiabel pa motibu ku un bewaker mester sòru pa seguridat di e habitantenan i no por abusá di e situashon. No ta pornada ku e klientenan di FKPD ta biba bou di guía i mester protegá nan. Tur dos e bewakernan a keda retirá. 

Un hoben di 19 aña a keda kondená kompletamente kondishonal den detenshon hubenil pa 6 luna i un periodo di prueba di 2 aña pa motibu ku e la tene relashon seksual ku un mucha di 12 aña. Tambe e tabatin potrèt sunu di e mucha den su telefòn. Sin ku e mayornan tabata sa, e tabata buska e mucha mei anochi i bai su kamber kuné. 

Por último un homber ku a drenta kas di su bisiña mientras e tabata drumi i a mishi ku su parti intimo, a presentá dilanti hues. Ora ku e la lanta for di soño e homber a trata di konvesé pe tene relashon seksual. Al final e homber a bai kas kaminda ku e la keda detené. Na promé instante e a ninga ku e tabata na kas di e bisiña. Despues ku e la wòrdu konfrontá ku e resultado di DNA e la bisa ku e la mishi ku su bisiña pero ku su pèrmit. Korte no a kere e storia aki. Hues a kondená e homber na 3 aña di kastigu di prisòn pa aktonan kontra di moral ku un persona ku ta drumi, pero a apsolvé pa violashon. Den e kaso aki tambe e víktima tabata presente via konekshon di video. Su petishon di daño perhuisio a keda otorgá. E sospechoso a bai den apelashon.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com