click

PLAY 

Kòntròl den hóreka i na empresanan pa Direktorado di Supervishon i Mantenshon di Lei

For di promé di òktober, gerensia di Direktorado di Supervishon i Mantenshon di Lei ta hasiendo kòntròl intensivo riba kumplimentu ku e medidanan nobo di corona. Ku algun eksepshon, empresanan ta mantené nan mes korektamente na e reglanan. Esaki ta bal un kòmplimènt.


Algun establesimentu di hóreka no a kumpli ku e orario di sera. Tin empresa a sigui bende patras di lokèt despues di 10 or di anochi. A papia ku e empresanan aki tokante importansia pa kumpli ku e medidanan i nan a koregí esaki. Den simannan benidero, inspektornan lo sigui kontrolá riba e orario di sera intensivamente. Si empresanan no kumpli ku regla, lo tumá medidanan. Empresanan por risibí un but di $3000 pa kada infrakshon. Den kaso ku bolbe viola e reglanan, por sera e empresa temporalmente. Tambe proksimamente lo tin kontrol èkstra riba registrashon obligatorio den hóreka. Un bon registrashon di kliente ta importante, asina por keda atvertí hendenan si un kontagio a tuma lugá  den un establesimentu.


Gerensia di Direktorado di Supervishon i Mantenshon di Lei a bishitá tambe 30 kapsalon i salon di beyesa, supermerkado i minimerkado pa duna informashon tokante e medidanan aktual di Covid. Na e tiendanan, partikularmente, tambe a kontrolá si nan ta mantené nan mes na e ‘prijzenstop’, ku ta vigente for di inisio di e krísis di corona.


E ofisina di Direktorado di Supervishon i Mantenshon di Lei ta minimalmente okupá komo ku ta trahando for kas i hasiendo kòntròl na lokalidatnan. Si bo ke mèldu algu en konekshon ku inkumplimentu di e ordenansa di emergensia, bo por yama 715 5300. Pa mas informashon tokante medidanan, bishitá www.bonairecrisis.com òf un di e otro kanalnan ofisial di Entidat Públiko Boneiru. Tambe bo por tuma kontakto ku Departamento di Salubridat Públiko via number di telefòn 0800 0800.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com