click

PLAY 

KPCN a aktualisá manera di traha di relashoná ku pandemia Covid-19

E medida i konsekuensianan rondó di e vírus ‘Corona’ tin hopi influensia riba funshonamentu di nos komunidat. KPCN no ta un eksepshon, e kuerpo tambe mester adaptá su mes na esaki. Pa un instansia manera polis no ta posibel pa baha e kantidat di hende ku ta traha mirando ku polis ta un organisashon ku un funshon kritiko den komunidat.


P’esei a tuma algun medida di prekoushon pa protekshon di tantu agentenan komo di e komunidat di Boneiru, Sint-Eustatius i Saba.


E medidanan ta lo siguiente:

    •    Komo prekoushon ta pidi tur bishitante di warda di polis pa bisti un kapa di boka. Den kaso ku e bishitante mes no tin, KPCN por proveé den esaki. 

    •    KPCN ta trata na redusí momentunan di kontakto. Esaki ta nifiká ku e prosesonan lo ta adaptá; e siudadano mes lo skirbi kiko a pasa na momentu di hasi un keho serka polis i e miembronan di kuerpo lo sigui guia e proseso sea telefónikamente òf via di mail.

    •    E polisnan uniformá riba kaya por bisti un masker preventivamente, asta ora nan ta den outo di polis. 


Kuerpo Polisial ta hasi e supliká pa kada unu di nos mantené nos mes na e medidanan ku e Entidatnan Públiko di tantu Boneiru, Sint Eustatius komo Saba a imponé pa seguridat di kada persona.


Kuido di polis ta kompletamente funshonal i operashonal i e kuerpo lo sigui traha pa un komunidat sigur.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com