click

PLAY 

Mas medida pa protehá komunidat di Boneiru kontra vírùs di corona 

Na Boneiru tin kuater kaso aktivo di Covid-19. Den tur kaso ta trata habitante di Boneiru. Te ainda ta investigando e fuente. Den un kaso a konstatá ku tin un lina ku Kòrsou. A base di e kasonan aki nos ta konstatá ku e vírùs di corona ta na Boneiru. P’esei mester bini ku mas medida. 

Kòrsou
Ta suspendé e ‘air bubble’ ku Kòrsou desde djabièrnè 4 di sèptèmber. Habitantenan di Boneiru por bini bèk pero mester bai 14 dia den karentena. Bishitantenan si tin ku pidi pèrmit. Tur hende ku ta bini Boneiru mester yena e deklarashon di salú.  Si bo tin keho relatá na Covid-19 dia bo ta biaha no ta laga bo drenta Boneiru. Avionnan por sigui bula bini Boneiru ku pasaheronan ku tin eksonerashon.  

Europa
Pasaheronan ku ta bini for di Europa desde djaluna 7 di sèptèmber ta bai den karentena pa 14 dia si nan no tin prueba ku nan a tèst negativo. Esaki ta riba nan  propio gastu. Mester hasi e tèst aki un máksimo 72 ora promé nan biahe. 

Na Boneiru ta konstatá ku ainda hopi hende no ta tuma e menasá di vírùs di corona na serio. Pa esei ta bini ku algun medida adishonal. 

Aktividat
Ta prohibí por lo pronto tur aktividat ku kanto, baile i músika. Tur aktividat públiko no tin mag di tin mas ku 50 persona. Na fiestanan priva ta permití no mas ku 25 persona. Esaki ta konta tambe pa snèk, bar, kafetaria, restorant, trùk di pan i na playanan. Durante aktividat einan no ta permití mas ku 25 persona presente. 

Deporte
Aktividatnan deportivo por sigui pero sin públiko. Gym por keda habri pero funshonando riba 50% di nan kapasidat i teniendo kuenta ku 1.5 meter di distansia. 

Horeka
Horeka tin ku apliká e protokòl pa Covid-19 i mester kuminsá registrá tur bishitante nan nòmber i number di telefòn. Ta warda esakinan 21 dia. Nan ta keda funshoná riba 50% di nan kapasidat. Diskoteka i klupnan nokturno ta keda sera. 

Supermerkado
Pa supermerkado, tur kliente ta obligá di usa un garoshi. Ta permití solamente dos persona pa garoshi pa mantené e 1.5 meter di distansia

Trabou
Na trabou tur hende tin ku tene kuenta ku 1.5 meter di distansia i usa protekshon manera kapa di boka òf otro atributo. Ora tin reunion mantené e 1,5 di distansia. Laga airu fresku pasa na e kaminda ku ta traha un par di bes pa dia. Trahadónan tin ku keda mantené e reglanan di higiena na trabou pa nan i pa e klientenan. 

E medidanan aki ta pa protehá nos komunidat i salubridat general. Kuida bo mes i esnan rondó di bo

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com