click

PLAY 

MBO Bonaire a kuminsa den aña eskolar 2020/2021 ku e estudio nobo di ICT

Riba djamars 25 di ougùstùs 18 studiante a kuminsá ku e programa di introdukshon di e estudio nobo di ICT nivel 3 i 4. E studiantenan di promé aña aki ta sigui un estudio BOL di tres aña. Nan lo bai skol 5 dia pa siman i kore stage na diferente kompania i instansha na Boneiru. Un stage na Hulanda na final di e estudio tambe ta entre e posibilidatnan.

A ehekutá e prome tareanan di praktika den un edifisio di práktika kompletamente renobá, bou di liderasgo di dosentenan eksperensiá di ROC Mondriaan for di Hulanda. E dosentenan aki a bini riba invitashon di RCN i MBO Boneiru spesialmente pa hinka e lokalnan di ICT den otro i pa instruí e dosentenan di práktika nobo bon i guia nan na komienso di aña eskolar, ku ta dosentenan ku pa gran parti ta traha na RCN. 

ROC Mondriaan ta un partner importante di MBO Boneiru. E sosten di e team di enseñansa lo tuma luga mas aleu for di Hulanda i un par di ora pa luna lo tin lèsnan online tambe.

Riba djabierne 28 di ougùstùs a invitá representantenan di empresanan i instanshanan ku a duna un aporte na e estudio aki pa un sneak preview. E invitadonan tabata hopi impreshoná ku e fasilidatnan i a mustra nan apresio pa e manera kon e diferente partidonan a traha huntu pa logra kuminsa ku e estudio importante aki.

E estudio BBL lo kuminsa dia 23 di september. E espektativa ta ku tin mas o menos 16 studiante ku lo kombiná trabou ku siñamentu. Ainda tur studiante interesá no tin un trabou, pues den e dianan ku ta bini nan lo ta buskando un trabou nobo aktivamente.

E apertura ofisial lo tuma luga mas lat e aña aki.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com