click

PLAY 

Mediabus ta selebra 5 aña di eksistensia i ta kuminsa ku kampaña pa un bus nobo

Sinku aña kaba Mediabus ta bishitá skolnan básiko durante maintanan den siman pa asina entusiasmá muchanan di entre 6 i 12 aña pa lesa. Esaki pasobra ku 17% di e poblashon boneriano tin difikultat ku lesa i skirbi. Pues mas jòng nos kuminsa stimulá nos muchanan pa lesa papiamentu i hulandes, mas nan lo tin probecho di esaki mas lat den bida.

E Mediabus, un inisiativa di Fundashon Lesa i Skirbi Boneiru, ta hasiendo esfuersonan riba e tereno aki ku éksito grandi pa 5 aña kaba, pasobra kada aña mas o menos 1.500 muchanan ta bishitá e bùs i pues nan ta fia i lesa hopi buki grátis.

Djasabra último, 10-10-20, a selebrá e éksito aki i e 5 aña di eksistensia ku e Mediabus riba plenchi Wilhelmina. E invitá partner i empresanan importante pa pasa i tira un bista den e bùs i e surtido di buki ku tin disponibel.

Tambe e fundashon a parti revistanan pa selebrá e 5 aña di eksistensia i por a sera konosí ku e boluntarionan ku ta bai ku e bùs tur mainta na un skol básiko i ta sòru tambe tur djasabra mainta pa e bùs ta habrí entre 10or i 12or na Van den Tweel supermarket.

Banda di un fiesta chiki, 10-10-20 tabata tambe e señal pa kuminsá ku un kampaña pa rekoudá fondo pa un bùs mas nobo. Pasobra despues di 5 aña mester a tuma e desishon ku e tempu a yega pa remplasá e bùs ku un vershon mas nobo, di manera ku por sigui garantisá e skolnan tur dia. Pero remplasamentu di e bùs ta trese kune tambe gastu èkstra, gastunan ku e fundashon lamentablemente no por karga su so i ku e mester di yudansa. E fundashon ta spera ku pèrsonanan i organisashonnan kier yuda hasi e kompra di e bùs nobo posibel.

Entre tantu ya tin tres organisashon ku a bisa di kier yuda pa hasi e kompra di e bus nobo posibel. E fundashon ta spera ku mas lo sigui.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com