click

PLAY 

Ministerio di IenW i islanan ABC ta organisá diálogo di Reino ‘Together we can fly ABC’

Aviashon ta hopi importante pa e ekonomia di un isla. Esaki ta konta sigur pa islanan ABC. Pesei ministerio di Infratruktura i Waterstaat, IenW, ta organisá dia 22 di òktober un ‘diálogo di Reino’ uniko kaminda ku studiantenan for di Hulanda, Aruba, Boneiru i Korsou huntu ta hiba kombersashonnan pa haña un kontesta riba e pregunta: kon por organisá di un forma inovativo e futuro di aviashon pa karibe ku ta sigur, pagabel i duradero.

E diálogo ta konsistí na promé luga di un webinar kaminda ku representantenan di organisashonnan inovativo di aviashon, NACO, NLR, Falki Aviation Bonaire, EZ air i Ampaire, ta duna nan vishon tokante e futuro di aviashon den karibe. Aki tin espasio pa pregunta i reakshon. Na final ta sigui un challenge pa studiantenan pa bini ku solushonnan kreativo pa por bula di forma duradero. Nan por entregá un plan di negoshi kompakto. E ganadornan ta gana un bunita premio cash.

Meta di e inisiativa aki no ta solamente pa laga e generashon ku ta biniendo aki pensa tokante futuro di aviashon, pero tambe pa pone forsanan huntu den Reino: Hulanda, Aruba, Boneiru i Korsou.


Resientemente IenW a laga investigá e posibilidat pa bula di forma eléktriko of hybrid dentro di Reino. For di e investigashon a resultá ku islanan ABC ta hopi adekuá pa purba ku buelonan eléktriko. Banda di ta situá faborablemente i ku distanshanan kòrtiku entre e islanan, tur e fuentenan nesesario ta presente pa produsí energia. Pues ta mas ku interesante pa sigui duna forma na esaki.


Dor di entre otro e resultado positivo di tur e investigashonnan hasí, e ministerio di IenW a disidí di bai di akuerdo tambe pa traha un plan maestro ‘Proyekto inovativo pa bula di forma eléktriko den karibe’. Mester di mas imformashon pa e plan maestro aki i ainda tin hopi kos pa investigá, manera disponibilidat di avionnan eléktriko, infrastruktura pa karga e avionnan i kalkulashon di kuantu esakinan ta kosta. Na momentu ku e plan aki ta kla lo bini ku un proposishon pa introdukshon di buelonan duradero den e region di karibe, inkluyendo e sertifikashonnan nesesario, e liña di tempu, kuponan di trabou, espasio pa eksperimentá i realisashon. E resultado di e diálogo di Reino di 22 di òktober tambe lo ta parti di e formulashon di e plan maestro. Tambe den yanuari na Boneiru lo sigui desaroyá e partinan importante di e plan huntu ku mundu empresarial, institutonan di konosementu i gobiernunan di entre otro region di karibe. E plan maestro lo ta kla pa zomer 2021.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com