click

PLAY 

Ofisina di Dòkter Hermelijn ta habri bèk djárason

Bonaire Medical Clinic, e ofisina di dòkter Hermelijn na Kaya Libertador Simon Bolivar 12 ta habri bèk djárason 30 di sèptèmber pa duna servisio na pueblo di Boneiru. Dòkter Simon Eijsenga ta e médiko ku lo tuma na su enkargo tur konsulta i pashènt di dòkter Michael Hermelijn.

Dòkter Hermelijn, te ainda ta bou di kuido médiko despues di a tèst positivo pa Covid-19. Komo medida di prevenshon a disidí di sera ofisina Hermelijn pa 2 siman. Staf i personal di e ofisina a keda 14 dia den karentena preventivo. Djabièrnè 25 sèptèmber a finalisá e karentena aki pa e personal di ofisina. Niun otro trahadó a test positivo. Tur trahadó a test negativo.

Entretantu a desinfektá e ofisina kompletu i tambe a hasi un limpiesa total i ekstenso. Di e manera aki pashèntnan i trahadónan por hasi uso atrobe di e edifisio di dòkter Hermelijn.

E medidanan estrikto kontra Covid-19 lo sigui konta. Nan ta:

    -    Tur pashènt mester usa tapa boka

    -    Mantené distansia sosial di 1,5 meter 

    -    Máksimo 3 persona por ta paden den área di kuido

    -    Konsulta ta segun sita telefóniko (bo no por kana drenta si no tin sita)

    -    Pidi resèpt solamente via telefòn òf via Whatsapp na number +599 795 7171

Ofisina di Dr. Hermelijn lo ta habri di djaluna te ku djabièrnè mainta di 08:00  pa 13:00 di mèrdia.  Atardi di 14:00 pa 17:00.    

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com