click

PLAY 

Pa 2022 mester bin programanan struktural di investigashon di poblashon 

na Hulanda Karibense

Evaluashon ku a hasi di e proyekto di screening di kanser na pechu ku ZVK a organisá aki na Boneiru a pone ku a deskubrí kanser na pechu tempran serka algun hende muhé. Esei ta loke sekretario di estado di VWS, Paul Blokhuis, ta skirbi Tweede Kamer den un karta di djaluna 5 di oktober.


Segun e sekretario di estado den su karta ta asina ku na Hulanda Europeo investigashon ku ta hasi di kanser na pechu, na boka di matris i na tripa ta tuma lugá ku finansiamentu di e presupuesto di Reino i ehekushon ta na enkargo di e organisashon di screening bou di guia di RIVM.

Blokhuis ta skirbi mas aleu ku na e momentunan aki no tin screening struktural ta tuma lugá na Hulanda Karibense. Den 2018 e sekretario di estado a pidi RIVM pa duna un konseho tokante e ehekushon i struktura di investigashon den forma di programanan piloto na Hulanda Karibense. Huntu ku esei ZVK a kuminsa fin di 2018 kaba ku preparashon pa organisá  un investigashon di poblashon piloto di kanser na pechu na Boneiru. Den 2019 na luna di oktober a start ku e programa piloto aki.


En total a screen 341 hende muhé. Serka algun di e hendenan muhé aki a deskubri kanser na pechu tempran. E programa piloto aki a stop prome ku ora pa motibu di e krisis di corona. Blokhuis ta pone den su karta ku ela pidi RIVM, ku no tabata enbolbí  den e programa piloto aki, pa evaluá e programa i duna un konseho tokante e pregunta ku si ta responsabel pa sigui ku esaki i, si ta si, di ki manera por sigui ku ne. Pa motibu di e krisis di pandemia tambe a pidi RIVM konseho kon por kuminsa e programa atrobe.


E evaluashon a mustra ku a deskubrí kanser na pechu tempran serka algun hende muhé. Mesun momentu e evaluashon a duna puntonan konkreto kon pa sigui traha riba e investigashon di poblashon na Hulanda Karibense. Ta pesei segun Blokhuis ela pidi RIVM pa a base di e informashonnan aki traha un plan i un struktura di programa duradero pa investigashonnan di poblashon na Hulanda Karibense, pa kua e base mester ta kla pa mas tardá den 2022. Tambe ela pidi pa prepara pa yega na un organisashon di screening karibense kompletu pa ehekutá na Boneiru, i ku por hasi fasil na St. Eustatius i Saba.

Den esaki tin diferente parti, manera sigui ku e piloto di screening di kanser na pechu na Boneiru, kambia e piloto pa un programa kompletu pa mas tardá meimei di 2021, kuminsa ku pilotonan di screening di kanser na tripa i kanser na boka di matris na Boneiru i un plan kon pa atende ku organisashon di investigashon di poblashon na St. Eustatius i Saba. Mester kuminsa mas pronto posibel ku un prome piloto na e islanan ariba. E dunamentu di e enkargo aki na RIVM ta kuadra ku e forma di traha i eksperensia di e instituto aki ku investigashonnan na Hulanda Europeo. 


Esaki segun sekretario di estado di salubridat Paul Blokhuis den su karta na Tweede Kamer.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com