click

PLAY 

Pèrdida di entrada di 10 mion pa partisipantenan na enkuesta Kvk

Kámara di Komèrsio Boneiru a tene un enkuesta representativo bou di empresarionan tokante e impakto aktual di COVID-19 i e efekto di e medidanan di sosten riba nos empresanan. E resultadonan mas importante ta ku e pèrdida di benta ku a vèrwagt di e 256 empresanan ku a partisipá na e enkuesta ta berdaderamente hopi grandi, ku mas ku $ 10.000.000 na pèrdida di benta i ku e impakto riba nos empresanan ta grandi te demasiado grandi. 29% di e empresarionan ta teme pa sobrebibensia di nan empresa. 69% di e empresanan na Boneiru ta hasi uso di e areglonan ku e ministerionan a bini kuné pa absorbá pèrdida di benta i kubri gastunan fiho, entre otro gastu di salario. Uso di protokòl (59%) i adaptashon den e modelo empresarial ta posibel solushonnan pa hasimentu di negoshi den e sirkumstansianan nobo. Finalmente empresarionan ta di opinion ku idealmente turistanan ku ta bishitá nos isla, solamente ku un tèst di PCR negativo mester por drenta Boneiru; 78% di e empresarionan ta di opinion ku esaki lo ta un bon medida. 

Direktiva i gerensia di Kámara di Komèrsio a keda impreshoná pa resultado di e enkuesta: ‘E sifranan ta impaktante i impreshonante. Entre tantu ya kaba a hasi uso di nan pa na un manera argumentá duna konseho na ministerionan na Hulanda i Entidat Públiko Boneiru. Entre otro e sifranan ta indiká ku mester hasi lo máksimo pa mas rápido posibel, pero na un manera responsabel si, yega na un ‘kódigo hel’ pa Boneiru na interes di nos poblashon i Boneiru su empresarionan’. 

Hopi empresario ku un Kompania Privá (BV) a yena e enkuesta. Kompará ku Hulanda Oropeo na Boneiru tin relativamente hopi Kompania Anónimo òf Privá ku un kantidat chikitu di empleado. E enkuesta aki ta den liña ku, i un reflekshon di e repartishon ku tin den Registro Komersial di Kámara di Komèrsio pa loke ta trata e kantidat total di registrashon aktivo. Turismo ta e sektor mas grandi den ekonomia di Boneiru i ku esei den e kontestanan di e enkuesta tambe. Den e investigashon di Ofisina Sentral di Estadístika (CBS) ‘Trends in the Caribbean Netherlands 2019’ e partisipashon di turismo ta na mas òf ménos 38,4%. Den e enkuesta ku 42% esaki ta algu mas tantu. 

Kámara di Komèrsio a yuda empresarionan èkstra pa medio di hasi esfuerso pa mihó areglonan (entre otro un areglo adaptá pa empresarionan ku gastunan fiho ménos haltu) i pa medio di habrimentu di un lokèt di sosten. For di su apertura e lokét aki a kontestá mas ku 1000 pregunta i te ainda ta aktivo. Empresarionan ta prinsipalmente satisfecho (82%) ku e lokèt. Pa loke ta trata kontinuashon di e krísis, empresarionan na promé lugá ta vèrwagt ku Kámara di Komèrsio ta asumí un ròl komo un representante ku ta atendé ku nan interesnan, tantu lokalmente komo nashonalmente, i komo dunadó di informashon. 

Empresanan ku a partisipá na e enkuesta aktivamente ta risibí resultadonan di e enkuesta. Gustosamente Kámara di Komèrsio ke gradisí e empresarionan ku a tuma molèster pa yena e enkuesta. Naturalmente por haña e rapòrt riba wèpsait di Kámara di Komèrsio: www.kvkbonaire.com.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com