click

PLAY 

Prensa i “Influencer” hulandes na Boneiru

Den ougùstùs i sèptèmber Tourism Corporation Bonaire (TCB) den kolaborashon ku diferente partner den sektor turistiko a ‘host’ e promé prensa i influencer internashonal for di Hulanda. E strategia di e bishitanan aki ta pa duna un imahen kon seif ta pa biaha i eksperiensiá Boneiru durante Covid-19. 

Den sèptèmber, TUI Group i Resort Bonaire a risibí e promé miembro di prensa internashonal na Boneiru, despues ku a habri frontera. Arjen Lutgendorff, kende ta e editor ehekutivo di e revista hulandes TravelPro, a bishitá Boneiru pa promé biaha. Durante su bishitá, Arjen a tene diferente entrevista ku partnernan hotelero i a bishitá diferente luga turístiko, manera 1000 Steps, Gotomeer i Salt Pans. Ademas, Arjen a eksperensiá diferente aktividat ku Boneiru tin pa ofresé, manera Landsailing, Windsurf i tour di kueba. Lo publiká tur e entrevistanan i aktividatnan den e revista “TravMagazine” i ònlain riba página di “TravelPro”. 

Aktualmente, Boneiru ta forma parti di e lista di destinashonnan ku kódigo oraño. Pa demostrá ku e sektor turístiko na Boneiru ta sigui opera pa risibí turista for di Europa, TravelPro huntu ku diferente partner hotelero i TCB a traha un video den forma di un kompilashon di menshahenan positivo kaminda ta invitá turistanan pa bin bishitá nos isla asina ku e konseho pa biaha pa Boneiru bira hel. A publiká e video riba e página sosial di Facebook “TravelPro” i e página sosial di Facebook na hulandes “Bonaire Toerisme”. 

Den e luna di ougùstùs, TCB den kolaborashon ku TUI Group i Harbour Village Bonaire a risibí un di e “influencer”-nan mas konosí di Hulanda. Demira van der Zeeuw, miho konosí komo Dee, tin mas ku 1.4 mion siguidó riba su página di Instagram i mas ku 360 mil abonado riba su página di YouTube. Dee ta konosí pa su menshahenan positivo i su amor pa biaha na destinashonnan tropikal huntu ku su pareha i manager Lars. Durante di nan bishitá na Boneiru, Dee i Lars a eksperensiá diferente aktividat, manera Jeep Safari den Washington Slagbaai National Park, Snorkel Tour i Discover Scuba Diving. Dee a vlòg su eksperensiá na Boneiru i a publiká esaki riba su página di YouTube.

TCB ta yama danki na tur partner ku a partsipá pa hasi e eksperensiá di Arjen, Dee i Lars na Boneiru unu inolvidabel.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com