click

PLAY 

Qredits ta ekstendé periodo di grasia di 2% di interes ofresé na su klientenan

En konekshon ku e krísis kousá dor di Corona vírùs, Qredits a introdusí na mart último un suspenshon temporal di amortisashon di 6 luna durante kual e kliente ku apliká lo mester a paga solamente 2% di interes. Teniendo kuenta ku e desaroyonan relashoná ku e krísis, Qredits ta bai ofresé un ekstenshon di 6 luna mas i lo mantené e interes na 2%.

Qredits a introdusí un periodo di grasia spesial 6 luna pasá pa duna su klientenan un rosea pa por sobrebibí den e temporadanan difísil ku tabata spera. Durante di 6 luna e klientenan ku a apliká mester a paga solamente un interes redusí, ekivalente na 2%. 80% di e klientenan di Qredits a apliká pa e dispensashon di pago di amortisashon aki. Esaki tabata un muestra inmediato di e bon aseptashon di e akshon aki bou di Qredits su klientenan.  

Ekstenshon suspenshon temporal di amortisashon
En bista ku e situashon ta fèrfelu ainda pa hopi empresario, Qredits a disidí di ekstendé e periodo di grasia spesial pa 6 luna mas. Esaki ta nifiká ku klientenan ku a hasi uso di e dispensashon aki outomátikamente lo bolbe risibí un dispensashon di amortisashon adishonal di 6 luna bou di e mesun kondishonnan. Pues e kliente no mester bolbe apliká i e mester sigui paga solamente 2% di interes durante e próksimo 6 lunanan. Ku esaki Qredits ta spera di por sigui yuda su klientenan sobrebibí e efektonan negativo kousá dor di e periodo di e krísis andando.

Klientenan por kontinuá ku e amortisashon di nan fiansa
Si a kaso e kliente ke skohe pa kontinuá ku e amortisashon di nan fiansa, segun nan skema di pago original, Qredits ta habrí pa regla esaki. Klientenan ta semper liber pa tuma kontakto ku Qredits pa komuniká nan deseonan di hasi pago pa redusí nan fiansa. 

Pregunta
Qredits ta komprondé ku e periodo aki ta difísil pa hopi empresario. Bo ke sa di ki manera Qredits lo por yuda bo empresa?  Manda un mail na bonaire@qredits.nl òf tuma kontakto via 717-1412.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com