click

PLAY 

Riba término korto lo kuminsa ku e eksperimento di garantia di hipotek

Riba término korto lo kuminsá ku e eksperimento di garantia di hipotek na Hulanda karibense. Esei ta kontesta di minister Kajsa Ollongren di BZK riba pregunta di Attje Kuiken, miembro di Tweede Kamer, pa PvdA tokante e garantia aki. Segun Kuiken, esaki ta importante pa baha gastunan na Hulanda karibense.


Na fin di 2018 gobiernu di Reino a informá ku e ministerio di BZK lo a inisiá ku un eksperimento rondó di garantia di hipotek na Boneiru den 2019. E areglo aki mester stimulá esnan ku ke kuminsá yega na nan promé kas, famianan yòn i e klase sosial medio. Awor e minister ta bisa ku Nationale Hypotheek Garantie (NHG) i MCB na e momentunan aki ta trahando riba lansamentu di e pilot pa garantia di hipotek na Boneiru i ku e intenshon ta pa kuminsa ku e eksperimentu riba término korto.


Segun un publikashon anterior, vários reto rondó di finansiamentu pa kompra di un bibienda ta hasi difísil pa kumpra un kas na Hulanda karibense. Por ehèmpel bankonan normalmente ta finansiá solamente 80% di e balor di e bibienda. Esaki ta pone ku kumpradónan potensial di bibienda mester kontribuí ku un suma supstansial riba nan mes. Banda di esei e periodo di pago ta te ku máksimo e edat di 65 aña lokual ta pone ku despues di e edat di 35 aña ta bira difísil pa sera un hipotek.  


Na Hulanda NHG ta stimulá kompra di bibienda pagabel i aksesibel.  E areglo aki ta limitá e riesgonan finansiero pa kompra di un kas. Banda di esei hopi biaha esaki ta bai huntu ku un deskuento di interes pasobra e riesgo di banko ta mas chikitu. Un areglo di garantia di hipotek por brinda oportunidat  na e islanan tambe.  


E eksperimento aki lo mester tin un durashon di 5 aña i ta un di e palabrashonnan hasí den e Bestuursakkoord.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com