click

PLAY 

Roy Martina direktor nobo di direktorado di Espasio i Desaroyo

Direktorado di Espasio i Desaroyo (R&O) entrante promé di òktober tin un direktor nobo den e persona di Marlon ‘Roy’ Martina. “Na Boneiru tin desaroyo importante i notabel pero tin espasio pa sigui desaroyá”, Martina a splika su desishon pa skohe pa e funshon di direktor di R&O. 

Roy Martina ta ingeniero i a sigui tambe un estudio di MBA. Martina tin hopi eksperensia riba tereno di maneho. Te ku resien e tabata direktor di maneho na ministerio di SOAW na Kòrsou. Einan Martina a funshoná tambe un temporada komo sekretario general interino. E kier usa su eksperensia pa duna un kontribushon na e desaroyo ku ta tumando lugá na Boneiru. “Respetando regla i lei semper tin espasio pa desaroyá. Den e desaroyo tin ku tene kuenta ku e kustumber i kultura di Boneiru”, Martina a deklará.

Formashon di hóbennan tambe ta parti ku Roy Martina a dediká su tempu na dje. Pa Sint Eustatius ela skibi un plan pa un sentro vokashonal (Statia Welfare Improvement Association). For di aña 2005 te 2014 Martina tabata taskmanager na ministerio di Enseñansa na Kòrsou na unda ela manehá inovashon di edifisionan di skol. Tambe Martina tabata lider di proyekto pa renobá Fort Beekenburg, kaminda a laga hóbennan ku a kai for di e sistema di skol i no por a haña trabou, resosialisá i haña konosementu i abilidat pa traha den e sistema laboral. 

Roy Martina lo guia e direktorado di Espasio i Desaroyo (R&O) ku entre otro ta repartí tereno, duna pèrmit pa konstrukshon i ku ta kontrolá si ta mantené e reglanan di konstrukshon, maneho di propaganda i konstrukshon di kaya.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com