click

PLAY 

Segun sekretario di estado Keijzer, mester di supsidio struktural 

pa baha kosto di internet fiho

Sekretario di estado di EZK, Mona Keijzer den un karta na Tweede Kamer a duna informashon tokante tarifanan di telecom na Hulanda karibense. Keijzer ta trese dilanti ku e situashon di COVID-19 a pone ku ya ta supsidiando tarifanan di telecom temporalmente. Esaki segun CBS a pone ku tarifanan a baha ku 19.4% na Boneiru. Asina ta duna un aporte na e problematika di pobresa. E medida aki ta temporal i kabinete ta wak e posibilidatnan pa baha tarifanan di forma struktural.


Kompara ku Europa, e tarifanan di internet fiho na Hulanda Karibense, partikularmente na islanan ariba ta haltu. Pa haña un bista di esaki e sekretario di estado a laga ACM hasi un investigashon na Saba i Statia. ACM ta bisa ku e tarifanan ta haltu na e islanan ei dor di kondishonnan lokal ku no por influenshá, esta geografikamente nan ta ahisla, e topografia di e islanan, kondishon di tempu (area di orkan) i e kantidat limita di habitante. ACM mas aleu ta konklui ku e providernan na Saba i Statia no ta hasiendo ganashinan grandi i ku regulashon estrikto lo no resulta den un bahada grandi di preis. ACM den su raport ta trata diferente posibel medida pa baha gastunan, entre otro supsidiá uso di un kabel di bou di laman pa konekshon di internet, i koperashon of hasta fushon di partidonan pa por tin un eskala mas grandi i pa ta mas efisiente. Hasta ku tipo di medidanan asina probablemente e tarifanan di internet fiho na e dos islanan ariba lo no ta na e nivel di Hulanda. Pesei ACM ta bisa ku e uniko opshon pa tarifanan berdaderamente ta den liña ku esunnan na Europa ta supsidio direkto pa usuarionan.


Keijzer ta bisa di ta kompartí e konklushonnan di ACM su investigashon, esta ku sin supsidio lo no tin un bahada supstansial den tarifa. Mientras ku e ta bisa ku ounke ACM su raport ta trata Saba i Statia, e ta kalkula ku e mesun kos ta konta pa Boneiru. Ounke ku mester hasi un diferensha, ya ku tarifanan na islanan ariba ta hopi mas karu ku Boneiru. E sekretario di estado den su karta ta menshona diferente invershon ku a hasi riba e islanan, supsidionan di un biaha ku a duna, i bahada den tarifanan di providernan. E medidanan, bahada di tarifanan i areglo di supsidio a duna un impulso na e infastruktura di telekomunikashon i e servisionan ku ta duna. 


Pero pa un bahada di tarifa di internet fiho mester di supsidio struktural, segun Keijzer. Banda di esei ta deseabel pa diferenshá e supsidio entre Boneiru i islanan ariba pasobra internet na islanan ariba ta hopi mas karu. E supsidio aktual lo sigui otro aña, kaminda lo hisa e supsidio pa islanan ariba hasie 35 dollar (Na Boneiru e ta 25 dollar). Den prome parti di 2021 lo disidi si ta kontinua ku e supsidio den 2022. E siguiente gobiernu lo por disidi si ta hasi e medida aki struktural.


E sekretario di estado di EZK ta bisa mas aleu ku banda di supsidio mester purba ta mas efisiente. Pa esaki e ta den kombersashon ku providernan i e entidatnan publiko. Banda di esei e ta boga pa modernisashon den e leinan di telekomunikashon. Ya a tuma luga un kambio kaminda ta regula servisio di data tambe. Pa e periodo ku ta bini e ta investiga entre otro un revishon di e konseshonnan aktual.


Konkluyendo, Keijzer ta trese dilanti ku manera indika, e motibu mas importante pa tarifa haltu ta sirkumstansianan riba e islanan ku no por influensha. Dor di e krisis ela tuma medidanan pa baha e tarifanan temporalmente. Lo kontinua ku e medidanan aki. Pero pa supsidio struktural di Reino, ta logiko ku un siguiente kabinete tuma e desishon aki, mirando ku ta trata e periodo for di 2022. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com