click

PLAY 

Selibon ta dediká atenshon na World clean up day

Djasabra 19 di sèptèmber 2020 ta “World Clean Up Day”. Esaki ta un dia kaminda rònt mundu ta dediká atenshon na limpiesa di nos planeta. Pa medio di diferente akshon di limpiesa, diferente organisashon i persona ta uni forsa pa bai limpia den sierto áreanan ku tin mester di atenshon. 


Manera ta kustumber Selibon semper ta dediká atenshon na limpiesa di Boneiru riba e dia spesial aki. Mirando e medidanan di prekoushon kontra e vírùs di corona, Selibon a opta pa no organisá un evento grandi e aña aki manera ta kustumber. Pa tòg dediká atenshon na e dia aki, Selibon lo pone baki di shushi den diferente bario pa asina kada habitante por kontribuí na un Boneiru más limpi i bunita. 


E bakinan lo ta situá na :

    1.    Rincon Nort:           Kaya Trinitaria

    2.    Rincon Suit:             banda di Stadion Antonio Trenidat

    3.    Nort’i Saliña:           Kaya Pueblo i e vèlt di futbòl pega ku Mal Macho

    4.    Hato:                           patras di Curoil na Kaya Diamanta

    5.    Antriol Pabou:       Kaminda Djabou

    6.    Antriol Pariba:       Lugá di stashoná outo na Parke Patun Saragosa

    7.    Playa:                           Kaya Hermandad i Kaya Jean B Vitte

    8.    Nikiboko:                  Sentro di Bario Nikiboko

    9.    Amboina:                  Banda di stashon di resiklahe

    10.    Tera Kòrá:             Sentro di Bario Tera Kòrá


E bakinan lo keda henter e wikènt for di djabièrnè 18 di sèptèmber te ku djaluna 21 di sèptèmber 2020. Si e baki ta yen, por fabor pone e shushinan den banda di e baki. Kòrda pone tur artikulo elektróniko manera televishon, frishider i wasmashin den banda di e baki. Riba djaluna 21 di sèptèmber 2020 lo pisa tur e sushinan ku a kolektá pa asina por haña un bista di kuantu shushi a kolektá den kada bario. 


Di e forma aki Selibon ta brinda oportunidat na habitante di e diferente barionan pa nan tambe por aportá na e “Bonaire Clean Up Day”.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com