click

PLAY 

Test negativo di bishitantenan pa corona no ta sufisiente 

pa evita ku e virus ta drenta Boneiru

Segun sekretario di estado di VWS, Paul Blokhuis, obligashon pa bishitantenan a tèst negativo pa coronavirus pa por bishita Boneiru ta yuda pa baha e rísiko pa introdukshon di covid-19 na Boneiru, pero solamente un resultado negativo no ta sufisiente pa protehá Boneiru kontra corona. Resultado di tèst ta djis un bista di e momentu. Un resultado negativo ta trese kune e rísiko di seguridat falsu. Pesei resultado di tèst mester bai kombiná ku medidanan adishonal, manera obligashon di karantena.


Esei e sekretario di estado ta bisa den su kontestanan riba preguntanan di miembronan di Tweede Kamer Kuiken di PvdA i Diertens di D66 tokante covid-19 na e parti karibense di Reino. 


Tokante e moshon ku a pasa pa hasi posibel pa obligá hendenan pa a test negativo pa por bin Boneiru, Blokhuis ta bisa ku abase di Wet publieke gezondheid, Wpg, no por obligá un hende pa a test negativo pa corona. Pa bini ku e obligashon aki mester kambia e Wpg. Esaki no ta den e kambio di Wpg ku ta serka Tweede Kamer. Aworaki e sekretario di estado ta wak e deseo pa bini ku un lei ku ta konta pa Hulanda karibense pa obligá bishitantenan pa a tèst negativo pa por bishitá e islanan.


E miembronan di Kamer a puntra tambe kiko e situashon di Aruba ta nifiká pa kuido di salubridat na Boneiru. Segun Blokhuis, na Boneiru mes tin luga di kuido intensivo ku posibiliat di oksígeno. Banda di esaki tin 26 kama pa kuido pa covid. A reforsa e kapasidat di personal médiko via di uitzendbureau hulandes. Pa loke ta kapasidat di tèst, esaki ta disponibel di forma limitá pa kasonan urgente. Na dos laboratorio por hasi un kantidat chiki di tèst. Sobra tèst ta tuma luga na Korsou.


Blokhuis mas aleu den su kontestanan ta bisa ku mirando e eskala chikitu di Boneiru, no ta realístiko pa Boneiru mes soru pa tur su kuido intensivo. E ta bisa ku ta miho pa mehora e koperashon entre e hòspitalnan di e diferente islanan. E meta di esaki ta pa amplia e kalidat i disponibilidat di kuido dentro di e parti karibense di Reino i pa hasi e dependensia di kuido pafo di Reino mas chikitu.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com