click

PLAY 

Tourism Corporation Bonaire ta bai intensivá su koperashon ku Entidat Públiko Boneiru

Tourism Corporation Bonaire (TCB) ta bai intensifiká su koperashon ku Entidat Públiko Boneiru (OLB). Ta tempunan ekstraordinario ku retonan grandi pa e sektor turístiko di Boneiru, koperashon ta e garantia pa mihó resultado i mas rápido na interes di e sektor turístiko. 


Pa TCB koperashon ku OLB no ta nada nobo. E koperashon pa gran parti ta tuma lugá riba tereno di merkadeo, entre otro e Plan di Rekuperashon, Komunikashon aéreo i proyektonan asosiá. Huntu ta trahando duru pa desaroyá plannan di merkadeo, pa despues por implementá esakinan den fase. 


Siman pasá diputado Elvis Tjin Asjoe ku su tim a duna un presentashon na personal di TCB tokante e Plan Maestro di Turismo ku ta den ehekushon i e kontribushon di OLB den esaki. Di e forma akí e tim di TCB a haña un bista kla di e status di ehekushon di e plan maestro. Tambe a sinkronisá e espektativanan pa loke ta trata kontribushon i papel di kada ken den ehekushon di e plan maestro di turismo akí. 


Struktura aktual den TCB 

Na e momentunan akí mando diario den TCB ta den man di Business Manager, Marjolein Oleana. E ta okupá su mes temporalmente ku e tarea akí, te ora nombra un direktor nobo pa e organisashon. Manera ta e kaso desde ku a introdusí e funshon di Gerente General, Bonaire Holding Maatschappij N.V. (BHM) ta aktua komo dirigente (direktor statutario) di TCB. Derchlien Vrolijk, manager di merkadeo, den koperashon ku OLB i e sektor, ta ehekutá tur proyekto asosiá ku merkadeo. 


Turismo ta un pilá importante pa ekonomia di e isla. E sektor privá di Boneiru ta dependé pa kasi ochenta porshento (80%) di turismo i mas òf ménos un terser parti di e poblashon ta traha den e sektor di turismo. P’esei ta di sumo importansia pa uni forsa pa traha efektivamente i efisientemente na mantenshon, promoshon i desaroyo stratégiko di e sektor di turismo. 


Denter di poko lo sigui mas informashon tokante e plannan turístiko pa Boneiru. Si bo ta deseá di risibí e boletin informativo mensual di TCB, por registrá via marketing@tourismbonaire.com. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com