click

PLAY 

VWS ta trata na mehora e fasilidatnan pa grandinan na Hulanda karibense

Relashoná ku e rapòrt di Ombudsman tokante situashon di grandinan na Hulanda karibense, sekretario di estado di VWS, Paul Blokhuis, den un karta na Tweede Kamer a splika kiko ta hasiendo pa yuda grandinan pa nan por biba riba nan mes na kas mas largu posibel i partisipá den komunidat. Segun Blokhuis, inventarisashon promé ku 10-10-10 a mustra ku tin falta di fasilidatnan, fasilidatnan ku no ta di kalidat i falta di mantenshon na edifisio i aparatonan. VWS a disidí pa den tempu kòrtiku logra mehorashon riba tur tereno di kuido. Na 2015 komishon Spies a konkluí ku kuido a mehora konsiderablemente den 5 aña.

Blokhuis den su karta ta trata fasilidatnan di Wmo (Wet maatschappelijke ondersteuning). Na e momentunan aki ta duna e siguiente servisionan di sosten sosial; ayudo ku trabou di kas, servisio di kuminda, transporte na midí, pasadia i adaptashon di bibienda. Pa stimulá e posibilidatnan aki i pa laga e loke ta ofrese krese ku e demanda, e sekretario di estado entrante prome di yanuari 2021 ta hinka sosten sosial den e Besluit Zorgverzekering BES. Ku esaki ta garantisa ku grandinan por probechá di nan derecho riba kuido i sosten.


E sekretario di estado ta bisa aserka ku riba kada isla lo bini un punto sentral. Aki grandinan por bai ku nan preguntanan tokante yudansa i na un manera fasil hasi petishon pa un fasilidat di wmo. Dor di hinka provishonnan di wmo den Besluit Zorgverzekering BES i bini ku e punto sentral, ta sòru ku grandinan sa kiko ta e posibilidatnan di sosten ku tin. Di e forma aki por mira unbes ku tin eventual listanan di espera i despues por solushoná esaki riba un termino mas korto posibel.


Na Boneiru lo habri un sitio nobo pa aktividat durante dia, di manera ku e akohida por tuma luga mas serka posibel di e grandinan i ku ta amplia e kapasidat. Na Boneiru ta trata mas lihe pa reforsa e organisashon i governance di e instituto pa personanan desabilita pa asina realmente kumpli ku invershonnan na bienestar di habitantenan, habitantenan di mas edat i tambe e personal. Ta trahando riba plannan di konstrukshon di edifisionan i fasilidatnan pa e grupo di enfoke aki. Mas tarda den e promé kuartal di 2021 lo tuma e desishonnan nesesario. Di e forma aki lo invertí di forma dirigí den kalidat, edifisio i e kuido pa personanan ku un limitashon ku mester di kuido 24 ora pa dia. Ta desaroyando plannan pa fasilidatnan di bibienda riba eskala chikitu ku kuido i ayudo 24 ora pa personanan ku demensia. Blokhuis ta bisa di lo hasi su esfuerso pa yuda realisa esaki.


Pa hendenan por keda biba mas largu den nan mes kas mantelzorg ta importante. E sekretario di estado huntu ku e entidatnan publiko lo bai regla i organisá di manera ku ta bini sosten pa mantelzorgers. Kaminda ta posibel lo konektá ku fasilidatnan ku tei kaba pa kosnan kana mas lihe i pa uni forsa. Cocari i ZW Groep ta preparando pa e luna aki kuminsa ku 6 sitio di respijtzorg na Rincon. Via di e prueba aki e sekretario di estado ta bisa di lo formula e manera pa duna e respijtzorg aki di un forma kualitativamente bon for di mei mei di 2021. Tambe a palabrá ku Cocari ku e luna aki ta kuminsa ku akohida den dia, inkluyendo kuminda, djasabra mainta pa grandinan na Rincon. Blokhuis ta bisa ku e ta kere ku e akshonnan aki ta kumpli ku e remarkenan di Ombudsman.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com